ನಮ್ಮ ಕೊಳವೆ ಬಾವಿಯ ಮರುಪೂರಣ

ನೀರು ಕೃಷಿಕನಿಗೆ ಉಸಿರಿದ್ದಂತೆ. ಅಡಿಕೆ ಪತ್ರಿಕೆಯವರು ಹೇಳುವಂತೆ 'ನೀರ ನಿಶ್ಚಿಂತೆ' (ಬಹುಶ: ಶ್ರೀಪಡ್ರೆ ಕಾಯಿನ್ ಮಾಡಿದ ಶಬ್ದ), ನಿಜಕ್ಕೂ ಒಂದು ಸುಂದರ ಅನುಭವ. ನಾನು ಹುಟ್ಟುವುದಕ್ಕೂ ಮೊದಲು, ತಂದೆಯವರು ಆರ್ಥಿಕವಾಗಿ ಆಗಿನ್ನೂ ಸಾಕಷ್ಟು ಅಸ್ಥಿರವಾಗಿದ್ದಾಗ, ವರುಷಾನುಗಟ್ಟಲೆ ನೀರಿಲ್ಲದೆ ಪರದಾಡಿದ್ದರು. ಆ ಕಾಲವೆಲ್ಲ ಕಳೆದ ಮೇಲೆ ನಾನು ಸೆಕೆಂಡ್ ಪಿಯುಸಿಯಲ್ಲಿದ್ದಾಗ ನಾವೊಂದು ಬೋರ್ ವೆಲ್ಲ್ ಮಾಡಿಸಿದೆವು. ಅದು ಬಹಳ ವರ್ಷಗಳವರೆಗೆ ನಮ್ಮೆಲ್ಲಾ ಕೃಷಿಕಾರ್ಯಗಳನ್ನು ಆಧರಿಸುವ ಏಕೈಕ ನೀರಿನ ಮೂಲ ಆಗಿತ್ತು (ಈಗ ಇನ್ನೊಂದು ಬೋರ್ವೆಲ್ಲ್ ಇದೆ). ಆಗ ನಾವು ಅಡಿಕೆ ಪತ್ರಿಕೆಯ ಅನುಭವಗಳನ್ನು ನೋಡಿ ನಮ್ಮ ಬೋರ್ ಗೂ ಮರುಪೂರಣ ಮಾಡಬೇಕೆಂದು ಹೊರಟೆವು. ಬೇರೆ ಬೇರೆ ಕೃಷಿಕರು ಸರಳ ತಂತ್ರಗಳಿಂದ ತೊಡಗಿ ಸಾಕಷ್ಟು ಕ್ಲಿಷ್ಟ ವಿಧಾನಗಳ ವರೆಗೆ ಬೇರೆ ಬೇರೆ ತಂತ್ರಗಳನ್ನು ಪ್ರಯೋಗಿಸಿದ್ದರು. ನಾವು (ಅಂದರೆ ತಂದೆ) ಇದ್ದುದರಲ್ಲಿ ಸರಳವಾದ ವಿಧಾನವನ್ನು ಆಯ್ದುಕೊಂಡೆವು.

ನಮ್ಮ ಬೋರ್ವೆಲ್ ಇರುವ ಜಾಗ ಮೊದಲನೆಯ ಚಿತ್ರದಲ್ಲಿ ತೋರಿಸಿದಂತೆ ಇದೆ. ಬೋರ್ ವೆಲ್ ಇರುವೆಡೆಗೆ ಸ್ಥಳ ಸ್ವಲ್ಪ ಇಳಿಜಾರಾಗಿ ಇದೆ. ಮೊದಲೆಲ್ಲ ನೀರು ಪಕ್ಕದಲ್ಲಿ ಇರುವ ರಸ್ತೆಯ ಮೂಲಕ ಹರಿದು ನಮ್ಮ ಜಾಗದಿಂದ ಹೊರಗೆ ಹೋಗುತ್ತಿತ್ತು. ನಾವು ಅದನ್ನು ಸ್ವಲ್ಪ ತಿರುಗಿಸಿ, ಬೋರ್ ವೆಲ್ ನ ಬದಿಗೆ ಹರಿಸಿದೆವು.

ನೀರನ್ನು ಹಿಡಿದಿಡಲು ವೆಲ್ ಪಕ್ಕದಲ್ಲಿ ಒಂದು ದೊಡ್ಡದಾದ ಗುಂಡಿಯನ್ನು ತೋಡಿದೆವು. ಬಹುಶ: ಗುಂಡಿ ನನ್ನ ಎದೆಯೆತ್ತರಕ್ಕೆ ಇದೆ. ಅಗಲದ ಅಂದಾಜು ಸಿಕ್ಕಲು ನನ್ನ ಕೊಡೆಯನ್ನು ಅದರ ಪಕ್ಕ ಇಟ್ಟಿದ್ದೇನೆ. ಗುಂಡಿ ತೋಡಿದಾಗ ಸಿಕ್ಕಿದ ಮಣ್ಣನ್ನು ಬದು ಕಟ್ಟಲು ಉಪಯೋಗಿಸಿಕೊಂಡೆವು. ಅದರಿಂದ ಗುಂಡಿಯ effective depth ಸಾಕಷ್ಟು ಹೆಚ್ಚಾದಂತಾಯಿತು.

ನೀರಿಂಗಿಸುವ ಸುಖ!
ಹರಿದು ಹೋಗುವಷ್ಟು ಮಳೆ ಬಂದಾಗಲೆಲ್ಲ ಸುಮಾರು 100X60 ft ಜಾಗದ ನೀರು ಈ ಗುಂಡಿಯೊಳಕ್ಕೆ ಹರಿದು ಬರುತ್ತದೆ. ರಾತ್ರಿಯೆಲ್ಲ ಮಳೆ ಬಂದರೆ ಗುಂಡಿ ತುಂಬಿ, ಬದುವಿನ ಕುತ್ತಿಗೆಯ ತನಕ ನೀರು ಬಂದಿರುತ್ತದೆ. ಆದರೆ ನೀರು ಹೊರಕ್ಕೆ ಹರಿದು ಹೋಗುವುದಿಲ್ಲ.

ಈ ನೀರು ಎಲ್ಲಿಗೆ ಹೋಗುತ್ತದೆ?
ಈ ಪ್ರಶ್ನೆಗೆ ಉತ್ತರ ಹೇಳುವುದು ಸ್ವಲ್ಪ ಕಷ್ಟ. ಬಹುಶ: ಮೂರು ಸಾಧ್ಯತೆಗಳಿವೆ..
ಸುತ್ತಮುತ್ತಲ ತಗ್ಗು ಪ್ರದೇಶದಲ್ಲಿ ಒಂದು ಹೊರದಾರಿಯನ್ನು ಕಂಡುಹುಡುಕಿ ಬಸಿದು ಹೊರಹೋಗಿಬಿಡುತ್ತದೆ (ನಿರಾಶಾವಾದ!)
ಇಂಗಿ ಯಾರದೋ ನೆರೆಹೊರೆಯವರ ಬಾವಿಯ ಅಂತರ್ಜಲ ಹೆಚ್ಚಿಸಬಹುದು
ನಮ್ಮದೇ ಕೊಳವೆಬಾವಿಯ ಅಂತರ್ಜಲ ರೇಖೆಗೆ ಸೇರುತ್ತದೆ

ಮೊದಲ ಸಾಧ್ಯತೆ ಬಹಳ ಕಡಿಮೆ. ಏಕೆಂದರೆ ಹಾಗಿದ್ದಲ್ಲಿ, ಶೇಖರಗೊಂಡ ನೀರು ಬುರ್ರನೆ ಕ್ಷಣಾರ್ಧದಲ್ಲಿ ಖಾಲಿಯಾಗಿಬಿಡಬೇಕಷ್ಟೆ; ಇಲ್ಲಿ ಹಾಗಾಗುತ್ತಿಲ್ಲ.
ನೆರೆಹೊರೆಯವರ ಬಾವಿಯ ಅಂತರ್ಜಲ ಮಟ್ಟ ಹೆಚ್ಚಿದರೆ ನಮಗೆ ಒಂದಿನಿತೂ ಬೇಜಾರಿಲ್ಲ. ಭೂಮಿಯ ಮೇಲ್ಪದರದ ಒಂದು ಅಡಿಯನ್ನಷ್ಟೇ ನಮ್ಮದೆಂದು ನಂಬಿ, ಅದಕ್ಕೆ ಬೇಲಿ ಹಾಕಿ ಇದು ನನ್ನದು ಇದು ನಿನ್ನದು ಎಂದು ವಿಭಾಗಿಸಿಕೊಳ್ಳುವ ವ್ಯವಸ್ಥೆಯೇ ನನಗೆ ಒಮ್ಮೊಮ್ಮೆ ಹಾಸ್ಯಾಸ್ಪದದ ಪರಮಾವಧಿಯಂತೆ ಕಾಣುತ್ತದೆ. ಹಾಗಿರುವಾಗ ಇಂಗಿದ ನೀರು ನಮ್ಮ ಗಡಿರೇಖೆಗಳನ್ನು ಗುರುತಿಸದೆ ತನಗೆ ನೆಮ್ಮದಿಯಾಗುವ ಸ್ಥಳದಲ್ಲಿ ಉಳಕೊಳ್ಳುವುದಿದ್ದರೆ ಇರಲಿ ಬಿಡಿ!
ನಾವು ಈ ಕೊಳವೆಬಾವಿಯನ್ನು ಸುಮಾರು ಕಳೆದ ಹತ್ತು ವರ್ಷದಿಂದ ಉಪಯೋಗಿಸುತ್ತಿದ್ದೇವೆ. ಇಲ್ಲಿಯವರೆಗೆ ನೀರು ಕಡಿಮೆಯಾದ ಯಾವುದೇ ಲಕ್ಷಣ ಇಲ್ಲ. ಅದಕ್ಕೆ ಈ ವ್ಯವಸ್ಥೆಯ ಕಿಂಚಿತ್ ಕೊಡುಗೆ ಇದ್ದಿರಬಹುದಲ್ಲವೇ?. ನಮಗೆ ಇದಕ್ಕಾಗಿ ಹೆಚ್ಚೆಂದರೆ ೨೫೦ ರೂಪಾಯಿ ಖರ್ಚಾಗಿದೆ. ಈ ಖರ್ಚಿನ ಎದುರು ಇದರ ಪ್ರಯೋಜನ ಯಾರಿಗೆ, ಎಷ್ಟು ಆಗಿದೆ ಎನ್ನುವುದು ತೀರಾ ಅಸಂಗತ ಸಂಗತಿಗಳು. ಭೂಮಿ ತಂಪಾಗಲಿ..!

ನೀವೂ ಒಮ್ಮೆ ಪ್ರಯತ್ನಿಸಿ..

ವಸಂತ್ ಕಜೆ.