(ಪುಟ ೨): "ಈ ನೀರು ಕುಡದ್ರ ಉಚ್ಚಿ ಕುಡಧಾಂಗ ಆಗತೈತಿ ನೋಡಪಾ..!"

ಈ ಹಳ್ಳಿಯ ಜನ ಸದಾ ಒಂದಿಲ್ಲೊಂದು ಜಲಜನ್ಯ ಕಾಯಿಲೆಗಳಿಂದ ನರಳುತ್ತಲೇ ಇರುತ್ತಾರೆ. ವಾಂತಿ-ಬೇಧಿ, ಖೆಮ್ಮು, ಆಮಶಂಕೆ ಇಲ್ಲಿ ಎಲ್ಲರಿಗೂ ಖಾಯಂ. ಮಕ್ಕಳು, ಹೆಣ್ಣು ಮಕ್ಕಳು, ವಯೋವೃದ್ಧರು ಅತಿಸಾರ, ಅನಿಮೀಯಾ, ಅಶಕ್ತತೆ, ಮೂತ್ರಕೋಶದ ಹರಳು ಹಾಗು ಉದರ ಸಂಬಂಧಿ ರೋಗಗಳಿಂದ ನಿತ್ಯ ಪರಿತಪಿಸುತ್ತಿದ್ದಾರೆ. ಆಹೆಟ್ಟಿಯಲ್ಲಿ ಪ್ರಾಥಮಿಕ ಆರೋಗ್ಯ ಕೇಂದ್ರವಿಲ್ಲ. ಸುಲಭ ಶೌಚಾಲಯ ವ್ಯವಸ್ಥೆ ಕೇಳುವಂತಿಲ್ಲ. ಕೇವಲ ಸರಕಾರಿ ಕಡತಗಳಲ್ಲಿ ಮಾಹಿತಿ ನೀಡಿದ್ದು, ಅಂಕಿ-ಅಂಶ ದಾಖಲಿಸಿದ್ದು ಮಾತ್ರ ಹೌದು. ಮಾಹಿತಿ ನೀಡುವುದಕ್ಕೂ, ತಿಳಿವಳಿಕೆ ಮೂಡಿಸಿ ಯೋಜನೆಗಳು ಹಾಗು ಹಕ್ಕಿನ ಪ್ರತಿ ಅರಿವು ಮೂಡಿಸುವುದು ಬೇರೆ! ಇಲ್ಲಿ ಆ ಪ್ರಮೇಯ ಸರಳವಾಗಿ ಸಾಧಿಸಬಹುದಾಗಿದೆ?

ಆಹೆಟ್ಟಿ ಗ್ರಾಮದ ಹಿರಿಯರಾದ ನಿಂಗಪ್ಪ ನಿಂಗಪ್ಪ ದೊಡ್ಮನಿ ಹಾಗು ಮಲಕಾಜಪ್ಪ ಮಹಾದೇವಪ್ಪ ಜಗದಣ್ಣವರ್  ಅವರು ಅಭಿಪ್ರಾಯ ಬೇರೆಯೇ ಇದೆ. ಇಲ್ಲಿನ ಗ್ರಾಮ ಪಂಚಾಯ್ತಿಗೆ ಪರಿಹಾರಗಳು ಬೇಕಿಲ್ಲವಂತೆ. (ಪಂಚಾಯತ್ ರಾಜ್ ವ್ಯವಸ್ಥೆ ಹೇಗೆ ಕೆಲಸ ಮಾಡುತ್ತಿದೆ? ಎಷ್ಟು ಸ್ಥಳೀಯ ರಾಜಕಾರಣದಲ್ಲಿ ನರಳುತ್ತಿದೆ? ಎಂಬುದಕ್ಕೆ ತಾಜಾ ಉದಾಹರಣೆ!) ಇಲ್ಲಿನ ಸದಸ್ಯರಿಗೆ ತಾಳ-ಮೇಳ ಇಲ್ಲ. ಸಣ್ಣ ಹಾಗು ಮಧ್ಯಮ ಹಿಡುವಳಿ ಕಮತದವರಿಗೆ (೫ ಎಕರೆಗಿಂತ ಕಡಿಮೆ ಹೊಲ) ತಿಂಗಳಿಗೆ ೩೦/- ರುಪಾಯಿ ಹಾಗು ಹೆಚ್ಚು ಹಿಡುವಳಿ (೫ ಎಕರೆ ಮೇಲ್ಪಟ್ಟು) ತಿಂಗಳಿಗೆ ೬೦/- ರುಪಾಯಿ ನಳದ ಬಿಲ್ ಆಕರಿಸಲಾಗುತ್ತದೆ. ಆದರೆ ಬಹುತೇಕರು ಸಾವಿರಾರು ರುಪಾಯಿ ಬಾಕಿ ಉಳಿಸಿಕೊಂಡಿದ್ದಾರೆ. ಈ ಬಾರಿಯ ವಿಧಾನಸಭೆಯ ಚುನಾವಣೆಯ ಸಂದರ್ಭದಲ್ಲಿ ಬಿಜೆಪಿ ಅಭ್ಯರ್ಥಿ (ನವಲಗುಂದ ವಿಧಾನ ಸಭಾಕ್ಷೇತ್ರದಿಂದ ಸ್ಪರ್ಧಿಸಿ, ಆಯ್ಕೆಯಾಗಿದ್ದಾರೆ.) ಶಾಸಕ ಶಂಕರ ಪಾಟೀಲ್ ಮನೇನಕೊಪ್ಪ ಗ್ರಾಮಕ್ಕೆ ೧೦ ಸಾವಿರ ರುಪಾಯಿ ವಯುಕ್ತಿಕ ಧನ ಸಹಾಯ ಮಾಡಿ ಒಂದು ತಿಂಗಳ ಅವಧಿಗೆ ಕುಡಿಯುವ ನೀರು ಒದಗಿಸಿದ್ದರು! ಮತ್ತೆ ಯಥಾ ಸ್ಥಿತಿ. ಹೆಣ್ಣು ಮಕ್ಕಳ ಕರ್ಮ.

ಶಿರಕೋಳದ ಶಂಕರಗೌಡ ಪಾಟೀಲ ಧಾರವಾಡ ಜಿಲ್ಲಾ ಪಂಚಾಯ್ತಿ ಸದಸ್ಯರಾಗಿದ್ದರು. ಸದ್ಯ ಕಾಂಗ್ರೆಸ್ ಪಕ್ಷದ ಜಿ.ಬಿ.ಗುಡೆಣ್ಣವರ್ ಸದಸ್ಯರಾಗಿ ‘ಇದ್ದಾರೆ’. ಶಿರೂರ್ ಗ್ರಾಮ ಪಂಚಾಯಿತಿ ಅಧ್ಯಕ್ಷ ಸಂಗನಗೌಡ ಪಾಟೀಲ್ ಅವರು ಹೇಳುವಂತೆ.."ಆಹೆಟ್ಟಿ ಗ್ರಾಮದವರು ನೀರಿನ ಬಾಕಿ ಪಾವತಿಸಿದರೆ ಮಾತ್ರ ವಾಲ್ ಚಾಲೂ ಮಾಡಲಾಗುತ್ತದೆ. ಇಲ್ಲದಿದ್ದರೆ ಮಾನವೀಯತೆಯ ಆಧಾರದ ಮೇಲೆ ನಾವು ಬಿಡುತ್ತಿರುವ ನೀರು ಆಹೆಟ್ಟಿ ಜನರು ಕುಡಿಯಬೇಕು ಅಷ್ಟೆ. ಏಕೆಂದರೆ ನಮ್ಮ ಶಿರೂರ್ ಗ್ರಾಮದಲ್ಲಿ ೪ ಬೋರ್ ಇದ್ದು, ಪ್ರತಿ ಮನೆಗೂ ನಳದ ಜೋಡಣೆ ಮಾಡಿಸಿ ಕೊಡಲಾಗಿದೆ. ಶಿರೂರಿನಲ್ಲಿ ಎಲ್ಲರೂ ಕಡ್ಡಾಯವಾಗಿ ಬಿಲ್ ಪಾವತಿಸುತ್ತಾರೆ. ತಪ್ಪಿದರೆ ಅವರ ಮನೆಗಳಿಗೂ ಆಹೆಟ್ಟಿಯಾವರಂತೆ ನೀರು ಬಿಲ್ ಕುಲ್ ಇಲ್ಲ. ಆದರೆ ಅಲ್ಲಿಯವರಿಗೆ ನೀರು ಬೇಕು. ಬಾಕಿ ಇರುವ ೭೦ ಸಾವಿರ ರುಪಾಯಿ ಬಿಲ್ ಪಾವತಿಸುವುದು ಬೇಡ. ಪುಗಸೆಟ್ಟಿ ನೀರು ಬೇಕಿದೆ ಅಷ್ಟೇ?" ಎಂದರು.

ಇತ್ತೀಚೆಗೆ ಸಚಿವೆ ಶೋಭಾ ಕರಂದ್ಲಾಜೇ ಧಾರವಾಡಕ್ಕೆ ಭೇಟಿ ನೀಡಿ, ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಮಾತನಾಡುತ್ತ ಆಘಾತಕಾರಿ ಮಾಹಿತಿ (ಬಹುಶ: ಬಾಯಿ ತಪ್ಪಿ) ನೀಡಿದರು- "ಕರ್ನಾಟಕ ರಾಜ್ಯದಲ್ಲಿ ಕೊನೆ ಪಕ್ಷ ೧೫ ಸಾವಿರ ಜನಸಂಖ್ಯೆ ಇರುವ ಒಟ್ಟು ೫೬ ಸಾವಿರ ಹಳ್ಳಿಗಳಿಗೆ ಇಂದಿಗೂ ಸ್ವಚ್ಛ ಕುಡಿಯುವ ನೀರು ಒದಗಿಸಲು ಸರಕಾರಕ್ಕೆ ಸಾಧ್ಯವಾಗಿಲ್ಲ!"  ಇನ್ನು ನಮ್ಮ ಆಹೆಟ್ಟಿ ಜನಸಂಖ್ಯೆ ೩ ಸಾವಿರ! ಸರಕಾರದ ಲೆಕ್ಕದಲ್ಲಿಯೇ ಇರದ ಹಳ್ಳಿ.

ಎಲ್ಲ ಹಳ್ಳಿಗಳಿಗೆ ಸಮರ್ಪಕವಾಗಿ ಮೂಲಭೂತ ಸೌಕರ್ಯಗಳನ್ನು ಒದಗಿಸುವ ಭರವಸೆ ನೀಡುವುದು, ಸೂಕ್ತ ಯೋಜನೆಗಳನ್ನು (ಕೋಟ್ಯಾಂತರ ರೂಪಾಯಿ ವೆಚ್ಚದಲ್ಲಿ!) ರೂಪಿಸುವುದು, ಅನುಷ್ಠಾನ ಹಂತದಲ್ಲಿಯೇ ಪೂರ್ಣಗೊಳಿಸಿಬಿಡುವುದು..ಯೋಗ್ಯ ಅಂಕಿ-ಅಂಶ ಕಡತಗಳಲ್ಲಿ ದಾಖಲಿಸಿ ಮಾಧ್ಯಮಗಳಿಗೆ ಹೇಳಿ ಬಿಡುವುದು.. ಅದನ್ನೇ ಉರು ಹೊಡೆದಂತೆ ಪರಿಶೀಲಿಸದೇ ಸರಕಾರದ ಆಪ್ತಸಹಾಯಕನಂತೆ ಪತ್ರಕರ್ತರು ಪ್ರಕಟಿಸಿ, ಕೈ ತೊಳೆದು ಕೊಳ್ಳುವುದು.. ಇಂತಹ ಪವಾಡಗಳಿಗೆ ನಮ್ಮಲ್ಲಿ ಕೊರತೆ ಇಲ್ಲ!

ಉಚಿತ ವಿದ್ಯುತ್, ಉಚಿತ ಕುಡಿಯುವ ನೀರು, ರಸ್ತೆ, ಶಾಲೆಗಳು, ಗ್ರಂಥಾಲಯ, ಪ್ರಾಥಮಿಕ ಆರೋಗ್ಯ ಕೇಂದ್ರಗಳು..ಎಲ್ಲವನ್ನೂ ರಾಷ್ಟ್ರ ಮಟ್ಟದಲ್ಲಿ ಘೋಷಿಸಿ ‘ಬಿಲ್ ಕೊಡದಿದ್ದರೆ ಸೌಕರ್ಯ, ಸೌಲಭ್ಯಗಳ ಪೂರೈಕೆ ಇಲ್ಲ’ ಎಂದು ಆಯಾ ಗ್ರಾಮ ಪಂಚಾಯ್ತಿಗೆ ತಿಳಿಸಿ ಬಿಡುವುದು ಸರಕಾರದ ಆಡಳಿತ ನಿರ್ವಹಿಸುವ ಹೊಸ ರೀತಿ ಇರಬೇಕು! ಜಾಹಿರಾತಿನಲ್ಲಿ ಕಾಣದಂತೆ (*) ಚಿನ್ಹೆ ಹಾಕಿ..‘ಷರತ್ತುಗಳು ಅನ್ವಯಿಸುತ್ತವೆ’ ಎಂದು ನಮೂದಿಸಿದಂತೆ! ಇಲ್ಲಿ ಸಾರ್ವಜನಿಕ ಹಿತಾಸಕ್ತಿಯ ವಿಷಯ ಎಲ್ಲಿದೆ ಹೇಳಿ?  

ಪ್ರಯಾಸದ ಪ್ರವಾಸ ಮುಗಿಸಿಕೊಂಡು ಬರುವಾಗ ಆಹೆಟ್ಟಿಯ ಯಲಿಗಾರ ಹನುಮಂತಪ್ಪ ಎಂಬ ಹಿರಿಯರು ಭೆಟ್ಟಿಯಾದರು. ನಾವು ಬಂದ ಉದ್ದೇಶ ಕೇಳಿದರು. ಹೀಗೆ ನಮ್ಮನ್ನು ಝಾಡಿಸಿದರು- "ನಿಮ್ಮಂಥವರು ನಮ್ಮ ಊರಿಗೆ ಭಾಳ ಮಂದಿ ಬಂದ ಹೋಗ್ಯಾರ. ನಾವು ಟ್ರ್ಯಾಕ್ಟರ್ ಗಟ್ಟಲೇ ಮಂದಿನ ಗುಳೇ ಹೂಡಿಕೊಂಡು ಧಾರವಾಡ ಜಿಲ್ಲಾಧಿಕಾರಿ ಮುಂದ ಪ್ರತಿಭಟನಾ ಮಾಡೀವಿ. ಯಾರು ನಮಗ ಪರಿಹಾರ ಕೊಡಿಸಿಲ್ಲ. ಈ ಸಮಸ್ಯಾ ಅಷ್ಟು ಸರಳ ಬಗಿ ಹರಿಯುವ್ಹಾಂಗ ಕಾಣುದುಲ್ಲ. ನಿಮಗೂ ಪರಿಹಾರ ಕೊಡಸಲಿಕ್ಕೆ ಅಗೂದುಲ್ಲ ಅನ್ನೋದು ನನಗ ಗೊತ್ತೈತಿ. ಎನೋ ನಿಮ್ಮ ಹೊಟ್ಟಿ ಪಾಡಿಗೆ ಈ ಕಾಯಕಾ ಮಾಡಾಕ ಬಂದೀರಿ.. ಮಾಡಿಕೊಂಡ ನಿಮ್ಮೂರ ದಾರಿ ಹಿಡೀರಿ.."

ಆಹೆಟ್ಟಿಯ ನಾಳಿನ ಪ್ರಜೆಗಳು.. ಮಕ್ಕಳು, ಅಲ್ಲಿನ ಹೆಣ್ಣು ಮಕ್ಕಳು ಹಾಗು ವಯೋವೃದ್ಧರಿಗೆ ಸ್ವಚ್ಛ ನೀರು ಕುಡಿಯುವ ಭಾಗ್ಯ ಇಲ್ಲವೇ? ಅಥವಾ ಈ ಕೀಳು ಮಟ್ಟದ ರಾಜಕಾರಣದಲ್ಲಿ ಹಳ್ಳಿಯೊಂದು (ಇಲ್ಲಿ ಪ್ರಾತಿನಿಧಿಕವಾಗಿ ಆಹೆಟ್ಟಿ..ಇಂತಹ ಸಾವಿರಾರು ಹಳ್ಳಿಗಳಿವೆ) ನಲುಗುತ್ತಿದ್ದರೂ ಅಧಿಕಾರಶಾಹಿ ಕೈಕಟ್ಟಿ ಕುಳಿತುಕೊಂಡಿರುವುದು ಕ್ಷಮ್ಯವೇ?

ಚಿತ್ರಗಳು: ಕೇದಾರನಾಥ್, ಜೆ ಜಿ ರಾಜ್