ಆದ್ರಿ ಮಳೆ ಹಬ್ಬ

ಹೆಸರು
ಧಾನ್ಯ ಸಂಸ್ಥೆ

ಪರಿಚಯ

ಜಲಸಿರಿ ಪತ್ರಿಕೆ ಕುರಿತು ನಾಲ್ಕು ಮಾತು

ಮಾನವ ಮತ್ತು ಪರಿಸರ ಅಭಿವೃದ್ಧಿಯನ್ನು ಮುಖ್ಯ ದ್ಯೇಯವನ್ನಾಗಿಟ್ಟುಕೊಂಡು ಕೆಲಸ ನಿರ್ವಹಿಸುತ್ತಿರುವ ತುಮಕೂರಿನ ‘ದಾನ್ಯ’ ಸಂಸ್ಥೆಯು ಪ್ರಕಟಿಸುತ್ತಿರುವ ತ್ರೈಮಾಸಿಕ ಪತ್ರಿಕೆ “ಜಲಸಿರಿ ನೀರ ನೆಮ್ಮದಿಗಾಗಿ”. ನೀರಿನ ಸುದ್ದಿಗಳಿಗಾಗಿಯೇ ಮೀಸಲಾದ ಈ ಪತ್ರಿಕೆ ೨೦೦೫ರ ಆಗಸ್ಟ್ ನಿಂದ ಪ್ರಕಟಗೊಳ್ಳುತ್ತಿದೆ. ನೀರಿನ ವಿವಿಧ ಆಯಾಮಗಳ ಬಗ್ಗೆ ಸುದ್ದಿ ಪ್ರಕಟಿಸುವ ಮೂಲಕ ಜನಸಾಮಾನ್ಯರಲ್ಲಿ ಜಲ ಸಾಕ್ಷರತೆ ಮೂಡಿಸುವುದು. ಇದರ ಧ್ಯೇಯ.

ಪ್ರಸ್ತುತ ಪರಿಸ್ಥಿತಿಯಲ್ಲಿ ನೀರು ಬಹು ಚರ್ಚಿತ ವಿಷಯ. ಬಳಕೆ ಯೋಗ್ಯ ನೀರಿನ ಲಭ್ಯತೆ ಕಡಿಮೆಯಾಗುತ್ತಿರುವುದು, ನೀರಿನ ವ್ಯಾಪಾರೀಕರಣ, ಖಾಸಗೀಕರಣ ಶುರುವಾಗಿರುವ ಈ ಹಂತದಲ್ಲಿ ನೀರಿನ ಸುದ್ದಿಗಳಿಗೇ ಮೀಸಲಾದ ಪತ್ರಿಕೆಯೊಂದರ ಅಗತ್ಯವಿದೆ ಎಂಬ ಆಶಯದಿಂದ ಸಮಾನಾಸಕ್ತ ಗೆಳೆಯರ ಉಸ್ತುವಾರಿಯಲ್ಲಿ ಪತ್ರಿಕೆ ಪ್ರಕಟಗೊಳ್ಳುತ್ತಿದೆ.

ನೀರಿನ ಸಮಸ್ಯೆಗಳಿಗೆ ಪರಿಹಾರವಾಗಬಲ್ಲ ಚಿಕ್ಕ-ಚಿಕ್ಕ ಪ್ರಯತ್ನಗಳು, ಸಮುದಾಯದ ಮಟ್ಟದಲ್ಲಿ ನಡೆದಿರುವ ಯಶೋಗಾಥೆಗಳನ್ನು ಪ್ರಕಟಿಸುವುದು. ಸರಳ ಮತ್ತು ಸುಲಭ ಜಲ ಸಂರಕ್ಷಣಾ ಪದ್ಧತಿಗಳನ್ನು ಪರಿಚಯಿಸುವುದು. ನೀರಿನ ಸಂರಕ್ಷಣೆ ಹಾಗೂ ಬಳಕೆ ಕುರಿತಾದ ಪಾರಂಪರಿಕ ಜ್ಞಾನದ ಪ್ರಕಟಣೆ ಹಾಗೂ ದಾಖಲಾತಿ. ನೀರುಳಿತಾಯ, ನೀರಿನ ಮರುಬಳಕೆ, ಮಳೆನೀರು ಸಂಗ್ರಹ, ಚಾವಣಿ ನೀರು ಸಂಗ್ರಹ, ಪರಿಸರ ಪೂರಕ ನೈರ್ಮಲ್ಯ ಇತ್ಯಾದಿಗಳ ಬಗ್ಗೆ ಸರಳ ಉಪಾಯಗಳನ್ನು ಪರಿಚಯಿಸುವುದು ಹಾಗೂ ಈ ನಿಟ್ಟಿನಲ್ಲಿ ಯಶಸ್ವಿಯಾದವರ ಬಗ್ಗೆ ಮಾಹಿತಿ ನೀಡುವುದು ಪತ್ರಿಕೆಯ ಆದ್ಯತೆ.

ಪ್ರತಿ ಸಂಚಿಕೆಯನ್ನು ಆಯಾ ಕಾಲದ ಮಳೆ ನಕ್ಷತ್ರಗಳ ಆಧಾರದಲ್ಲಿ ಗುರುತಿಸಲಾಗುತ್ತಿದೆ. ನಮ್ಮ ಗ್ರಾಮೀಣ ಜನತೆಯ ಬದುಕು, ದುಡಿಮೆಗಳೆಲ್ಲಕ್ಕೂ ಮಳೆ ನಕ್ಷತ್ರಗಳೇ ಮೂಲವಾಗಿರುವುದರಿಂದ ಇದು ಸೂಕ್ತ ಎನಿಸುತ್ತದೆ. ‘ಸಂಪುಟ’ ಎಂಬುದಕ್ಕೆ ಬದಲಾಗಿ ‘ವರ್ಷ’ ಎಂದು ಬಳಸಲಾಗುತ್ತಿದೆ. ಜನರ ಆಡು ಮಾತನ್ನೇ ಸಾದ್ಯವಾದಷ್ಟು ಬಳಸಬೇಕೆನ್ನುವುದು ಇದರ ಉದ್ದೇಶ. ಸ್ವಂತ ಅನುಭವದ ಹಾಗೂ ಕೃಷಿಕರ ಬರಹಗಳಿಗೆ ಹೆಚ್ಚಿನ ಒತ್ತು ನೀಡಲಾಗುತ್ತಿದೆ. ನೆಲ-ಜಲ ಉಳಿವಿಗೆ ಜನಾಂದೋಲನ ರೂಪಿಸುತ್ತಿರುವ ಹಿರಿಯರಾದ ‘ಶ್ರೀ’ ಪಡ್ರೆಯವರು ಆರಂಭದಿಂದಲೂ ಪತ್ರಿಕೆಯ ಆಶಯಗಳಿಗೆ ಬೆಂಬಲ ಸೂಚಿಸುತ್ತಿದ್ದಾರೆ. ನೀರು ಮತ್ತು ನೀರ ಬಳಕೆಗೆ ಸಂಬಂಧಪಟ್ಟಂತೆ ಬಳಕೆಯಾಗುವ ಪದ/ಶಬ್ದಗಳನ್ನು ಪರಿಚಯಿಸುವ ‘ನೀರ ಪದ’ ಅಂಕಣವನ್ನು ಪ್ರಾರಂಭಿಸಲಾಗಿದೆ.

ನೀರುಳಿತಾಯ, ನೀರಿನ ಸಮರ್ಥ ನಿರ್ವಹಣೆಯ ಬಗ್ಗೆ ಓದುಗರಲ್ಲಿ ಅರಿವು ಮೂಡಿಸಿ ಅವರ ಮನೋಭಾವದಲ್ಲಿ ಬದಲಾವಣೆಯನ್ನುಂಟು ಮಾಡಲು ಪತ್ರಿಕೆ ಆಶಿಸುತ್ತದೆ.